பிரதான கருவறையில் எழுந்தருளியுள்ள பகவதியம்மனின் திருவுருவம் கண்களையும் மனசையும் விட்டு அகலாது. அஷ்டபுஜங்களுடன் கூடிய அழகிய திருமேனியுடன் கம்பீரமாக அமர்ந்து தரிசனம் தருகிறாள். புற்றிலிருந்து வெளிப்பட்ட சுயம்பு கல் வடிவத்தின் முன்பாக வைத்து பூஜிக்கின்றனர். நந்தாதீபம் ஏற்றி அம்பாளிடம் பூ வாக்கு கேட்கின்றனர். இக்கோவிலில் காணப்படும் சிறியாநங்கை எனும் மூலிகை இலையை விஷக்கடிக்கு மருந்தாக பயன்படுத்துகின்றனர். அமாவாசை தினங்களில் சிறப்பு ஆராதனை நடைபெறுகிறது.