பாற்கடலைக் கடைந்து அமிர்தம் எடுக்க தேவர்கள், அசுரர்கள் மந்தர மலையை மத்தாகவும், வாசுகியை கயிறாகவும் பயன்படுத்தினர். அப்போது மந்தர மலை தாங்காமல் கடலில் மூழ்கத் தொடங்கியது. அதைத் தாங்க திருமால் ஆமை வடிவம் எடுத்து மலையின் அடிப்பகுதியில் சென்று தாங்கினார். அந்த ஆமை வடிவமான திருமாலை வழிபட்டதால் கச்சபூரம் என்ற பெயர் ஏற்பட்டது. காலப்போக்கில் அது திருக்கருக்கூர் என மருவியது. ஒவ்வொரு தலமாகச் சென்று இறைவனை வழிபட்டு வந்த சுந்தரர் இத்தலத்திற்கு வந்தபோது உச்சி நேரம். பசியும் களைப்பும் மிகுந்தது. கோவில் வாசலுக்கு எதிரே உள்ள பதினாறு கால் மண்டபத் தூணில் சாய்ந்து அமர்ந்தார். அப்போது ஒரு பெரியவர் வந்து “நீ யார்? இங்கு எதற்காக வந்தாய்?” என்று கேட்டார். சோர்வால் சுந்தரர் பதில் சொல்லவில்லை. அந்த பெரியவர் ஓடி சென்று சோற்றுமூட்டை கொண்டு வந்து சுந்தரருக்கு சோறு ஊட்டினார். பசியாறிய பின் சுந்தரர் அந்த பெரியவரை தேட அவர் மறைந்துவிட்டார். சுந்தரருக்கு பெரியவர் வடிவில் வந்து சோறு இட்டவர் திருந்திடீஸ்வரர் என்பதே ஐதீகம். இத்தலம் தேவாரத் திருத்தலம் உப திருத்தலங்களில் ஒன்று

மூலஸ்தானத்தில் சிவலிங்கத் திருமேனியாக எழுந்தருளியுள்ளார் கச்சபேஸ்வரர். அழகிய சிறிய பாணம் கொண்ட திருமேனி. ராகு மூர்த்தி அம்சம் உடையவர். மைகூவூர் கோவில் அப்பன், திருந்திடீஸ்வரர் என்ற திருநாமங்களும் உண்டு. கிழக்கு நோக்கிய சந்நிதி. கச்சபம் (ஆமை) வடிவில் திருமால் வழிபட்டதால் கச்சபேஸ்வரர் என்ற பெயர் பெற்றார். இடது பக்க சந்நிதியில் அம்பாள் மஞ்சநாதச்சியம்மை தெற்கு நோக்கி திருக்கோலத்தில் காட்சி தருகிறாள். பாசம், அங்குசம் ஏந்திய மேல் கரங்கள், அபய–வரத முத்திரை கொண்ட கீழ் கரங்கள், அழகிய திருமேனி. “மயூரநாத சன்னதி” என்ற பெயரும் உண்டு. தென் பகுதியில் உள்ள தியாகராஜர் மண்டபத்தில் அமிர்த தியாகேசர் எழுந்தருளி அருள்பாலிக்கிறார். அழகிய திருமேனி. திருமாலுக்கு அமிர்த நடனம் ஆடியவர். திருக்கருக்கூர் தியாகராஜரின் நடனம் “நட்ட விநோத நடனம்” எனப்படுகிறது. தியாகராஜர் மண்டபத் தூண்களிலும், விநாயகர் சந்நிதி விமானத்திலும் ஆமை வடிவில் திருமால் காட்சி செதுக்கப்பட்டுள்ளது. கோபுர முகப்பு மண்டபத்திலும் இதே காட்சி சிற்பமாக அமைந்துள்ளது. ஞான விநாயகர், வள்ளி-தெய்வானை உடனாய முருகப் பெருமான், பஞ்ச லிங்கங்கள், சூரியன், நால்வர், நாகர், சிவலிங்கங்கள் ஆகிய மூர்த்திகளை தரிசிக்கலாம். 27 தூண்களுடன் நட்சத்திர மண்டபம் உள்ளது. வடக்கு சுற்றிலும், கிழக்கு நோக்கிய சந்நிதியில் திருந்திடீஸ்வரர் சிவலிங்க வடிவில் எழுந்தருளியுள்ளார். சுந்தரருக்கு சோறு இட்டவர் என்பதால் இந்தப் பெயர் பெற்றார்.