மாரியம்மன் கோவிலை விரிவுபடுத்தும் பணி தொடங்கும் முன் ப்ரஸன்னம் பார்த்ததில், முதலில் சிவனுக்கு ஒரு கோவில் கட்டுமாறு குறிப்பு வந்ததாம். அதன்படி புதியதாக இவ்வாலயத்தை ஸ்தாபித்து, பின்னரே இவ்வூர் மாரியம்மன் கோவிலை விரிவுபடுத்தினார்கள் என குறிப்பொன்று தெரிவிக்கின்றது.

மூலவர்: கங்காதீஸ்வரர், அம்பாள்: ஆனந்தவல்லி. ஆட்டூர் எனப்படும் கங்காதரபுரத்தில் சிவலிங்க ஸ்வரூபமாக எழுந்தருளியுள்ளார் கங்காதீஸ்வரர். கம்பீரமான அழகிய திருமேனி. அம்பாள் ஆனந்தவல்லி கருணை ததும்பும் எழில் வடிவமாக தரிசனம் தருகின்றாள். வலச்சுற்றில் ஞானசக்தி விநாயகர், வள்ளி - தெய்வயானை உடனாய ஞானஸ்கந்தர், ஞானபைரவர், ஸ்ரீலஸ்ரீ சத்குரு ஞானானந்த ஸ்வாமிகள், நவகிரகங்கள் ஆகிய மூர்த்தங்களை தரிசிக்கலாம். எல்லா மூர்த்தங்களும் சுற்றியிருக்க, ஸ்வாமியும் - அம்பாளும் நடுநாயகமாக எழுந்தருளியுள்ளனர். உண்டியல் கிடையாது. காணிக்கை ஏதும் செலுத்த வேண்டியதில்லை.